日前黃昏時份，行經東百老匯30餘號時，一個老番流浪漢裝腔作勢向一名華人女子吼叫，隔冇幾遠有個白人中年男子企停，大喝：「你唔好搞佢呀！」睇嚟，如果條友有進一步行動，白人會衝上去保護弱質女流，八友離得較近，估計會「不自量力」，推開傻佬。流浪漢可能有自知之明，發完癲後，急步而去。危機解除後，白人望咗一陣，先至趕路。八友對佢見義勇為，頗為感激。因為紐約街頭或地鐵站，危機四伏。

據警方通報，正在通緝一名涉嫌制造連環捅人案男子。條友上個禮拜喺曼哈頓街頭刺死一個遊民，而最近發生嘅兩單類似襲擊事件亦好大可能同佢有關。三單襲擊案發生時，附近監控都拍到同一名男子，調查正在進行中。

上個禮拜教功夫班時，學咗12年嘅白人律師約翰話多謝八友教佢技擊而自己獲得自信。「乜突然咁客氣。」。原來，約翰嗰日喺地鐵站等車時，背後有人拍佢肩膊，佢擰轉頭，只見一個流浪漢懷有敵意說：「你唔可以企喺呢度。」約翰立即戒備，後退。流浪漢向佢逼近兩步。約翰雙手護胸，雙眼緊盯說：「你唔好再挑釁我。」約翰說，對方可能睇得出佢練過技擊，喃喃自語後，走開。「如果我唔係練過功，真係唔知點應付，所以要多謝教導。」約翰學功夫時，已年近50，手軟腳浮，佢勝在肯練習，依家馬步穩，出拳有勁，自衛綽綽有餘。所以，太家有時間，不妨學番三招兩式，得閒就練習，日子有功，自不然反應靈敏，保護自己。