總統拜登周前喺白宮頒發總統自由勳章，共有17人獲得呢項平民最高榮譽，其中25歲體操女杰「黑珍珠」拜爾斯不但獲得殊榮，并且成為歷來最年輕之勳章獲得者。拜爾斯之獲奬，令好多人呷嗮醋，其中過氣總統特朗普嘅前律師艾利斯（Ellis）就係社交媒體，指拜爾斯係「失敗者」，批評啱啱宣布退役嘅「黑珍珠」已不復當年勇，拜登冇理由頒獎俾一名過氣運動員。拜爾斯被記者問到有乜回應回應時，只表示「艾利斯，佢係乜誰？」講真又係，論名氣，艾利斯拍馬都趕唔上。

拜爾斯不但喺過去三屆奧運會表現出色，特別喺倫敦嗰屆，力挽狂瀾，除咗自己披金戴之外，更協助美國隊勇奪團體金牌。同時，佢更勇敢發聲，直指前國家隊隊醫勞倫斯·G·納薩爾(Lawrence G.Nassar)係披著人皮之狼，性侵害多少國家女子體操隊成員。據了解，受該名狼醫塗毒嘅包括拜爾斯及其他數百名未成年和成年女性，其中有美國參加2012年及2016年奧運會之女子體操隊大多數成員。遭受天譴嘅纳薩爾喺2018年被判入獄157年。入獄之前有冇要佢練「葵花寶典」？唔知，為條友好，係都應該。拜爾斯一為國家出力，二為受害女性發聲，喺咪應該獲得白宮肯定？頒個總統勳章過佢，濕碎啦！有乜理由眼紅？

講起呢位奧運女子體操金牌得主，佢日前喺自己網頁發文，同網友共享搭機趣事，話早前坐飛機時，由於自己嬌小玲瓏，空姐一度以為佢仲係小朋友，竟然向佢送上填色簿作為禮物。佢話自己已經25歲，空姐唔信，又拒絕提供酒精飲品過佢，令拜爾斯啼笑皆非。

讀者記唔記得2016年嗰屆巴西奧運？即係拜爾斯初露鋒芒嗰次，當佢為美國女子體操隊獲得首枚金牌時，NBC電視台居然喺畫面上出現一隻馬騮。連自己國家嘅精英都受此對待，你話冇歧視？鬼信咩！