2019年香港黑暴，煽動青少年上街搞破壞嘅幕後黑手真係冇陰功，數以千計年輕人俾佢哋玩謝咗。大家仲記唔記得企圖搶槍而遭警察射傷嘅16歲少年曾志健？佢潛水近兩年後，終於喺日前連同其他三個棄保潛逃嘅馮清華、王愷銘及黃姓少年，喺西貢碼頭擬乘快艇前往台灣時被捕。據警方介紹，4人之窩藏地點包括荃灣一個工廈單位，環境惡劣，冇窗，4人有一年多冇出街，誠惶誠恐過日子，半飢半飽渡時辰，有助逃者為逃避追查，會不時轉移匿藏地點，以不人道手法，將4人放喺紙箱內並封好，如貨物搬運到另一個窩身地點。因為唔敢外出剃頭，被捕時，長髪披肩，神情憔悴。如果佢哋當初肯認罪聽判，頂多坐一年，依家已經出獄從新做人，使乜搞成人唔似人，鬼唔似鬼。何苦來哉！

參加貽害社會嘅暴動，肯定冇好下場，中外如是。就以美國國會騷亂來講，調查委員會舉行聽證會期間，1名當日有份參與騷亂嘅男子艾爾斯（Ayres）即場向執法人員講「對唔住」，表示自己受到前總統特朗普選舉舞弊謊言蒙蔽，現在後悔已晩。佢幾乎喊出嚟：「我因為呢件錯事，已經失去做咗20年嘅工作，因要還債及生活，不得不將房屋出售。好似艾爾斯嘅例子，相信多不勝數。「我嘅選票被偷走。」講嘅人講到真嘅一樣，但居然有人相信。想深一層，詐騙電話，無日無之，已然係老生常譚，應該連三歲小朋友都唔信，但事實上，又真係有唔少人上當。難怪俗語說：「轎唔怕舊，最緊要有人受。」果然如此。