「嘩！乜紐約咁鬼死熱。」「大蘋果」呢幾日熱到冇影，出到街，熱風撲面而來，八友怕熱，汗流浹背，用抹手紙都唔掂，要自備一條毛巾。番到屋企，八女開嘅冷氣先至涼得一陣陣。「美國熱，歐洲更熱。」八女說。八友2019年9月曾去過倫敦，甚為涼爽，但新聞稱，倫敦早日氣溫打破記錄，高達40．3度，英國甚少用冷氣，地鐵座位用絨布，相信好多人熱到阿媽都唔認得。

全世界備受山火或極端熱浪煎熬，環保人士憂心仲仲。聯合國秘書長古特雷斯日前喺德國柏林舉行嘅「比德斯貝格氣候對話」（PCD）時提出嚴厲警告，表示冇一個國家能夠對氣候危機置身事外：「一係全體動員，一係集體自殺。大家揀邊樣。」古生又說：「最令我感到憂慮嘅係，國際社會面臨呢場影響全球之危機，但未能以多邊社會方式合作應對。各國繼續推諉卸膊，而唔係我哋共同未來承擔責任……我哋正面臨抉擇，選擇權掌握喺我哋手中。」

記得特朗普上任總統之初，曾宣布美國退出國際氣候委員會，佢話唔相信有氣候暖化呢個問題。對此，全球嘩然！幸而拜登上台後，再度申請入會，美國先至唔使俾人鬧「冇常識。」讀者仲記唔記得瑞典嗰個「環保少女」？呢個靚妹除咗鬧特朗普之外，仲鬧埋中國人用筷子，有損環保，結果俾唐人回嗆：「小朋友，筷子係用竹做㗎！唔好亂噏當秘笈。」咿！環保少女久未露面矣！專心讀書乎？應該係咁，讀多啲書，長多啲知識，先至可以服務社會。