「邊個有咁大嘅狗膽，喺老虎頭上叮蚤乸？」「吳啊萍，你依家已經被刑事拘留，同大家解釋下，究竟乜嘢原因你要同死喺日軍手上嘅千千萬萬中國人過唔去？」相信稍為留意大陸新聞嘅讀者都知道，八友講嘅係南京九華山公園裏面玄奘寺，竟然係「靖國鬼社」，日前被揭出供奉有四個日軍戰犯之長生牌位，供奉人署名為「吳啊萍」，該消息隨即喺網上引發網民憤怒。要知道，侵華期間，日軍曾經喺南京進行慘無人道，滅絕人性之殺戮，超過30萬同胞死喺呢場戰役。而被供奉嘅4個日寇，均為該戰之主犯。

友人大隻講說，事件分明剃中國人睇眉，侮辱性甚強。中國有關方面好嘢，已揪出元兇吳啊萍。聽講佢話想要化解怨恨喎！咁都得？八友認為，為戰犯安裝長生位，目的只有一個，就係想佢哋往生極樂，輪迴再生。咁，南京大屠殺幾十萬枉死者又當如何。「啊萍，唔好為自己搵藉口囉！要安裝長生位，都係安俾死難同胞，你居然安俾殘殺自己同胞嘅鬼子，天大理由，都難以自圓其說，乖乖認罪罷了。」另一方面，玄裝寺主持明知咁樣有問題，點解仲要咁做？「應該係為鈔票，俗稱有錢使得鬼推磨，乜事唔做得出！」據南京市公安局玄武分局玄武門派出所回覆記者查詢時稱，已開展調查核實「吳啊萍」身份。此外，涉事寺廟已經封停，調查情況將喺南京公安官網發布。

大隻講懷疑吳啊萍係咪中國人，因為咁做有違本性。八友覺得冇乜出奇；早前日本前首相安倍晉三被刺身亡，有華人女記者報道消息時，傷心落淚。幾個大陸、香港藝人喺網上發文悼念，就算佢哋迷日、懼日，都唔使咁丟人現眼，醜態畢露也。